Cùrsaichean fo-cheuma

Tha sinn a' tabhainn chùrsaichean anns a' chànain, a' chultar agus an litreachas a rèir a h-uile ìre fileantais, gu h-àraidh luchd-tòiseachaidh.

Faodar Eòlas Gàidhlig a dhèanamh mar cheum MA, dùbailte no mar cheum co-bhannta. Faodar cuideachd a' Ghàidhlig a dhèanamh sa chiad agus san dàrna bliadhna maille ri prìomh chuspair a' cheuma agaibh, mar eileamaid de na roghainnean às a' phrògram .

Lorgas an seo fiosrachadh air structar a' chùrsa cheuma Ghàidhlig agus mar as urrainn dhuibh Gàidhlig a thaghadh mar chuspair a bharrachd sa chiad bhliadhna. Carson nach gabh sibh an cothrom thighinn gu là fosgailte an Oilthigh ach am faic sibh cò ris a tha an t-Oilthigh agus Obair Dheathain coltach.

Is dòcha nach dèan sibh Gàidhlig ach airson aon teirm, air neo airson bhliadhnachan a' cheuma air fad. Ge brith dè slighe a ghabhas sibh, gheibhear cothrom air ionnsachadh mun chànain as sine a bhuineas do dh'Alba a tha fhathast ga bruidhinn, gus piseach a thoirt air ur cuid sgilean Gàidhlig ann an àrainneachd chuideachail, thaiceil.

Lorgas an seo fiosrachadh air na cothroman air Gàidhlig a dhèanamh mar eileamaid de cheum
aig Oilthigh Obar Dheathain.

• Dè structar a' cheuma MA ann an Eòlas Gàidhlig?
• Dè an cùrsa cànain as fhreagarraich dhòmhsa?
• Dè na cuspairean eile as urrainnear a ghabhail maille ri Gàidhlig?
• Am faod mi Gàidhlig a dhèanamh mar phàirt de cheum Ceilteach?

Dè structar a' cheuma MA ann an Eòlas Gàidhlig?

Tha Eòlas Gàidhlig a' cur prìomhachas air nua-Ghàidhlig na h-Alba; a' chànan, litreachas agus sòisealtas. Tha dà shreath cànain fa leth sa chùrsa cheuma:
aon dha luchd-tòiseachaidh no daoine gun Ghàidhlig idir, agus aon dha daoine le Gàidhlig aig Àrd Ìre (luchd-ionnsachaidh), air neo dha daoine le Àrd Ìre (luchd-fìleanta). Tha an dlùth-chùrsa dha luchd-tòiseachaidh ag amais air oileanaich a thoirt gu fileantas a thaobh leughadh agus
sgrìobhadh cho luath 's as urrainn, leis na cùrsaichean dha oileanaich aig a bheil Gàidhlig mar-thà a' cur fòcas air fìor ghrinneas agus a' leasachadh dhòighean-labhairt agus briathrachais. A bharrachd air a' chànain, agus bhon chiad bhliadhna a-mach, tha cothrom aig oileanaich ionnsachadh mu bheul-aithris, litreachas, planadh cànain, cànanachas agus sòisio-chànanachas. Is urrainnear cuideachd cuspairean a thaghadh às roinnean eile. Faodar an MA ann an Eòlas Gàidhlig a dhèanamh mar cheum dùbailte le urram.

Dè an cùrsa cànain as fhreagarraiche dhòmhsa?

Is urrainn dha oileanaich gun Ghàidhlig, no le glè bheag dhith, dlùth-chùrsa luchd-tòiseachaidh a dhèanamh sa chiad agus san dàrna bliadhna. Tha an cùrsa dha luchd-tòiseachaidh a' leantail prògraim de chlasaichean cànain, stèidhichte air na leabhraichean 'Progressive Gaelic', a sgrìobhadh airson a' chùrsa seo leis an Dr Moray Watson .

Bidh na h-oileanaich aig a bheil eòlas mar-thà, ge brith ma tha Gàidhlig aca bho thùs, bho fhoghlam tro mheadhan na Gàidhlig no mar neach-ionnsachaidh, a' leantail cùrsa nas adhartaiche a bhios a' togail air agus a' neartachadh an cuid eòlais air a' chànain.

Dè na cuspairean eile as urrainn dhomh a ghabhail maille ri Gàidhlig?

Anns a' chiad dà bhliadhna, bidh ùine agaibh cuspairean eile a dhèanamh
a bharrachd air na cuspairean a tha deatamach a chum ceum sa Ghàidhlig.
Uime seo, tha e cudromach gun seall sibh ris an fharsaingeachd chuspairean
eile as urrainnear a ghabhail mus tig sibh chun Oilthigh an toiseach (seallaibh
ri Clàr nan Cùrsaichean ). Aig Obar Dheathain, gabhaidh ceum Gàidhlig cuideachd
ga dhèanamh ann an co-bhuinn le cuspairean eile, le cothrom ann dà
phrìomh chuspair a thaghadh bhon chiad bhliadhna. Cuidichidh am fiosrachadh
a leanas sibh ann a bhith a' taghadh dè na cuspairean a eile a nì sibh suas gu ìre
ceuma le urram.

Ceumannan Gàidhlig Dùbailte le Urram

• MA ann an Eòlas Gàidhlig - prògram ceuma ann an co-bhuinn: le Daonn-Eòlas, Rianachd Gnothachais, Eòlas Ceilteach & Angla-Shasannach, Eaconamas, Beurla, Cultar Lèirsinneach & Film, Fraingis, Cruinn-Eòlas, Gearmailtis, Eachdraidh, Cànan agus Cànanachas, Poileataigs, Sòisio-Eòlas, Spàinnteach no Eòlas Diadhaidh & Creideamh.
• MA Co-bhannta le Urram ann an Eòlas-Inntinn, Matamataig, Foghlam, Gnothachas Eadar-nàiseanta no Ceòl (le Gàidhlig mar mhion-chuspair).
• LLB (Lagh) le Gàidhlig

Airson barrachd fiosrachaidh air na cùrsaichean riatanach, seallaibh ri Sònrachaidhean Prògraim Eòlas Gàidhlig

An urrainn dhomh Gàidhlig a ghabhail mar phàirt de cheum an Ceilteis?

Faodaidh oileanaich a tha airson Gàidhlig a dhèanamh air feadh an ùine aca aig an oilthigh ceum dùbailte a dhèanamh ann an Gàidhlig agus Ceiltis is Eòlas Angla-Shasannach.

Faodaidh oileanaich a tha airson Ceiltis is Angla-Shasannach a dhèanamh mar ceum singilte no còmhla ri cuspair eile cùrsaichean Gàidhlig a dhèanamh aig ìrean 1 agus 2.

Tha na roghainnean a gheibhear tron phrògram ionnsachadh leasaichte a' toirt dhuibh an cothrom Gàidhlig a dhèanamh ri taobh prìomh chuspair ur ceuma. Tha cothrom aig oileanaich Oilthigh Obar Dheathain (ach a-mhàin an fheadhainn a tha a' dèanamh Eòlas-Leighis no Fiaclaireachd) cuspairean a thaghadh às ionnsachadh leasaichte . Gheibhear bharrachd fiosrachaidh an seo air mar as urrainn dhuibh Gàidhlig a dhèanamh.

Ionnsachadh Maireannach sa Ghàidhlig

Bidh cothrom Gàidhlig a thaghadh mar aon de na ceithir cuspairean deug a bhios ri ghabhail tron phrògram ionnsachadh maireannach dha oileanaich a' tòiseachadh aig Ìre 1. Gus Gàidhlig a bhith air ainmeachadh air tar-sgrìobhadh ur ceuma, cha leig sibh leas ach aon chùrsa cànain a dhèanamh gach teirm sa chiad dà bhliadhna. Tha oileanaich a' tòiseachadh aig an ìre as fhreagarraiche a rèir nan sgilean Gàidhlig aca. An dèidh dhaibh tòiseachadh aig Ìre 1, agus ma chuireas iad crìoch oirre, faodaidh iad a dhol air adhart gu Gàidhlig Ìre 2. Le dà bhliadhna de Ghàidhlig agaibh, bu chòir dha seo barrachd chothroman obrach a chruthachadh dhuibh ann an Alba, agus gu h-àraidh air a' Ghàidhealtachd agus na h-Eileanan.

Gàidhlig tro Farsaingeachd Foghlaim

Faodaidh oileanaich cùrsaichean ann an Eòlas Gàidhlig a dhèanamh sa chiad dà bhliadhna de cheum mar phàirt den phrògram Farsaingeachd Foghlaim . 'S urrainn dha oileanaich Gàidhlig a thòiseachadh aig ìre a fhreagras air na sgilean Gàidhlig aca, agus ma shoirbhicheas leotha aig Ìre 1, faodaidh iad a dhol air adhart gu Ìre 2 sa Ghàidhlig.

Tha sgilean Gàidhlig a' toirt dhuibh bharrachd chothroman ann an saoghal na h-obrach. Chan eil an crìonadh san eaconamaidh air mòran crìonadh a dhèanamh air na cothroman ann an saoghal obrach na Gàidhlig, le fàs a' tighinn air fhathast. Tha iarrtas mòr air ceumnaichean Gàidhlig Oilthigh Obar Dheathain, agus leis an fharsaingeachd chuspairean a tha sinn a' teagasg - cho math ris na dòighean ionnsachaidh againn; stèidhte air cleachdadh agus eòlas - tha na ceumnaichean againn le cothroman dha-rìribh a thaobh chothroman obrach. Tha sinn le ceanglaichean làidir le fastaichean, buidhnean an Riaghaltais agus le buidhnean a tha air ceumnaichean an Oilthigh fhastadh roimhe, agus tha na ceanglaichean sin air an cleachdadh fad na h-ùine gus leasachadh a thoirt air na cùrsaichean againn. Tha ceumnaichean sna trì cuspairean tric a' dol air adhart gu cosnaidhean inntinneach, tarraingeach; agus iad gu math sùbailte nan sgilean an taca ri ceumnaichean chuspairean eile.

Air ceumnachadh bho chionn ghoirid

Tha oileanaich Ghàidhlig a tha air ceumnachadh bho chionn goirid air a dhol air adhart chun na leanas:

• ag obair a chum PhDan, an Obar Dheathain agus thall thairis
• ag obair ann an ealan, dealbhadh agus riochdachadh didsiotach
• ag obair sna meadhanan Gàidhlig
• a' teagasg tro mheadhan na Gàidhlig
• ag obair aig Iomairt Loch Abar
• a' foillseachadh nobhail
• ag obair ann an tasglannan Gàidhlig
• a' trèanadh gu a bhith na t(h)idsear.