Traditional
There were four and twenty nobles stood at the king's ha'
And bonny Glenlogie was flooer o them a'.
There were nine and nine nobles rade roon Banchory Fair
And bonny Glenlogie was flooer o them there
Doon come Jeannie Gordon, she come trippin doonstairs,
And she's fa'en in love wi Glenlogie over a' that was there.
She called on his footboy that stood by his side
Now who is that young man and far does he bide?
'His name is Glenlogie when he is at hame,
And he's o the Gay Gordons and his name is Lord John.'
'Glenlogie, Glenlogie, you'll be constant and kind,
I've laid my love on you and you're aye in my mind.'
He turned him roon Iichtly as the Gordons do a',
Says, 'I thank ye Jeannie Gordon, but your tocher's ower sma.
She called on her maiden to make her a bed,
Wi ribbons an napkins to tie up her head.
'There's a nice little fellow wi a dark rollin e'e,
If I get not Glenlogie, for him I will dee.'
'O haud yer tongue Jeannie, an give up your folly,
I'll lead you to Drumwhindle, he has more gold than he.'
'O haud your tongue, father, an let Jeannie be,
If I get not Glenlogie, for him I will dee.'
Her father had a chaplain, a man o great skill,
He wrote a broad letter, an he penned it well.
When Glenlogie got the letter, amang noblemen,
'I wonder,' said Glenlogie, 'what does young women mean?'
When he looked at the letter a licht laugh laughed he,
But when he read the letter a tear blind his e'e.
'Go saddle the black horse, and saddle the broon;
Bonnie Jeannie o Bethelnie will be dead ere I win.'
O pale and wan was she when Glenlogie come in,
But red and rosy grew she when she kent it was him.
'Turn roon, Jeannie Gordon, turn to your right side,
And I'll be the bridegroom, and ye'll be the bride.'
Now Jeannie's got married and her tocher down told;
Bonnie Jean o Bethelnie was scarce sixteen years old.
Bethelnie, o Bethelnie, ye shine where ye stand;
May the heather bells around you shine o'er Fyvie's land.