Blackhall, Sheena
The month o Januar comes in
Wi droothy Hogmanay,
Auld Eel we'll fete wi reamin plate
Syne neist it's Burns' Day.
The month o Februar is cauld
The weeks rin faister yet
St Valentine brings flooers an wine
Let nane their luv forget.
In Merch, the bannock's in the pan,
Tae mithers, gifts are gien
The Teuchit Storm howls roon the barn,
The parks are brierin green.
Feel's Day takks in the Easter month
Fin eggs rowe doon the brae
There's sun, there's win, there's caul, there's rain
The skies weir hodden grey.
The first o Mey's a magic time
Gyang wash yer face wi dew
Ne'er cast a cloot till Mey be oot
Or cauld will gar ye grue.
In mony's a toon the month o June
Brings merriege tae the fore
For auld langsyne, the Solstice myne
The mountain taps explore!
In saft July the showdin hey
Is dried afore the weet
For gin St Swithin draps his tears
Fur forty days it's weet!
In August, guns are cleaned an iled
The corn begins tae fill
At Games an Fairs, fowk shakk aff cares
An daunce wi richt gweed will.
September's sere. The deein year
Brings Autumn's equinox
Fin hairst is cut, an windaes shut
An sleekit slides the fox
October: eildritch Halloween
An neepie lanterns bricht
Fin bogies steer wi faces queer
An guizers brave the nicht.
November. Bonfires licht the lift
Reid Poppies noo are thrang.
St Andrew's Day takks oot the month
Wi poem an Scottish sang.
December's here. Yule's near at haun
Wi bubblyjock an cheer
Takk up a dram baith maid an man
Tae toast the Scottish year.