Young Byron In Aberdeen

Scott, Alexander

Thon hirplan bairn wi the face o an angel
Will sing like a lintie and loo like a deil,
He'll lowp outowre convention's dreel
Tae connach the God o Calvin's evangel

His tongue will teir frae reiver and strumpet
The laird's brocades and the leddy's braws,
Tae ding doun tyranny's Jericho waas
His miminy mou will rair like a trumpet.

The hauflins nou rin by him quicker,
Mockan, 'Ye're slaw eneuch for the grave!
But he that yet will outrin the lave
Gaes hirplan forrard, slaw but siccar.