Glennie, James D.
The Sojer'd seen a thoosan sichts
Bit this fair bleer't his ee'en,
Aul Bennachie in the caul caul licht
O a big roon hairvest meen.
He steed at the fit an goupit up
An aa wis calm an still,
Fin a silken shrood fell owre the meen
An happit oot the hill.
Fin mist gid bye he saa a sicht
Nae mortal ee'e hid seen
For the Deil wis there wi's horn't heid
Droolin owre a heath'n steen
Neist he saa a thackit hoose
An a lass her bannocks byakin
A lichtsim cheil wis at the door
An baith the twa war claikin.
The cheil he said, "afore yir throwe
A road ah'll bigg o steen
Tae tak ye tae the Mither Tap
An we'll mairry fin ah'm deen".
She toss't her heid an gid a lauch
Her cheeks wir grow'en rosie
"A'richt ma lad gyang bigg yir road
An ah'll tak ye tae ma bosie.".
Wi gloatin smirk the cheil ran oot
An left the bonny Janet,
Wi forket flash an muckle soun
He bigg't a road o granitt.
The Deil wint back tae claim his bride
In monstrous shape he wis noo
The lassie kennin she'd bin trick't
Ran skirlin owre the girss o.
The Deil, he leuch an skirl't abeen
"Nae mortal man wull wad ye
Satan's wife ye said ye'd be
An Satan he wull hae ye.
He noo rax't a horny han
An touch't her on the shooder
The quine lat oot a piteous soon
Bit the deil aye leuch the looder.
The Sojer saa in the licht o the Meen
A rikkin steen upstannin,
An look't an thocht an winner't sair
O the Deil an his hellish waddin.
The Sojer'd seen a thoosan sichts
Bit this fair bleer't his ee'en
A Maiden Steen in the caul caul licht
O a big roon hairvest Meen
A Maiden Steen in the caul caul licht
O a big roon hairvest Meen.